Thursday, April 24, 2025

Zinda Hoon – Kaafi Hai?


Main zinda hoon...

Bas kaafi hai?


Roz subah ghar se nikalti hoon,

Shaam ghar laut aati hoon.

Kaafi hai?


Kashmir ke ek mod pe koi keh de,

"Tum Hindu ho?"

Aur goli chala de.

Phir bhi main chup hoon,

Kyuki ab tak meri baari nahi aayi.

Kaafi hai?


Main ladki hoon, par ab tak safe hun,

Raat ko kaam karke ghar lauti hoon,

Phir bhi rape nahi hua.

Logo ke hisaab se,

Mujh par toh ‘meherbani’ hai.

Kaafi hai?


Meri biwi ne mujhse alimony nahi maangi,

Suicide karne tak ka pressure nahi daala,

Apne aashiq ke liye mujhe ab tak drum mein nahi dala...

Toh main to “accha pati” hoon... kaafi hai?


Main Shraddha nahi thi...

Jiski mohabbat tukdon mein banti gayi,

Fridge mein dafan ho gayi...

Kaafi hai?


Main Manipur ki woh behan nahi thi,

Jise bheed ne kapdon se azaad kar diya,

Aur camera ne beizzati ko viral bana diya...

Kaafi hai?


Main Nadia ki chhoti si bachi nahi thi,

Jiski maut ke baad bhi

Justice sirf headlines aur vote bank ban gaya...

Kaafi hai?


Jis desh mein danga ek tweet se bhadakta hai,

Aur insaaf sirf viral hone se milta hai,

Us desh mein main zinda hoon... kaafi hai?


Mandir, masjid, mazhab ke beech

Ek insaan kahin kho gaya hai.

Na uski soch zinda hai,

Na uska sawal,

Bas uski laash headline ban kar

Kisi news anchor ka TRP ban gaya hai.


Main likh rahi hoon, bol rahi hoon,

Ab tak kisi ne thappad nahi maara...

Toh kya main azaad hoon?



Aaj Main zinda hoon.

Kaafi hai!!

No comments:

Post a Comment

Zinda Hoon – Kaafi Hai?

Main zinda hoon... Bas kaafi hai? Roz subah ghar se nikalti hoon, Shaam ghar laut aati hoon. Kaafi hai? Kashmir ke ek mod pe koi keh de, ...